IRichards Bay FC isishicilele isitatimende iziqhathulula kwisinqumo sokuqokwa kweMoses Mabhida Stadium njengenkundla ezosingatha umdlalo wayo ne-Orlando Pirates kwiCarling Knockout Cup.
IPSL namhlanje imemezele ukuthi iNatal Rich Boyz neZimnyama bazotholana phezulu kule nkundla kwi-semifinal yeCarling ngoNovember 8, ngo-15:00 ntambama.
Omunye umdlalo wesemifinal ophakathi kweLamontville Golden Arrows neMarumo Gallants uzodlalelwa eKing Zwelithini Stadium ngoNovember 9.
Isimemezelo sokuya komdlalo weBay neBucs eThekwini asibaphathanga kahle abalandeli bayo kwazise ekuqaleni kwesizini umengameli weqembu uJomo Biyela wayethembise ukuthi yonke imidlalo namaqembu amakhulu ePSL izodlalelwa eMhlathuze Sports Complex.
Ngenxa yolaka lwabalandeli, iBay ishicilele isitatimende icacisa ukuthi lesi sinqumo besingekho ezandleni zayo.
“Sicelaa ukucacisa kubalandeli ukuthi imidlalo yama-cup ihlelwa yiPremier Soccer League nomxhasi, okuyibo abanegunya lokuqoka inkundla okuzodlalwa kuyo.
“Iqembu lizobahlelela abalandeli abafisa ukuyobuka umdlalo. Zonke izinhlelo sizobhala ngazo emakhasini ethu ezokuxhumana.”
Amathikithi aqala ukudayiswa namhlanje ezitolo ze-Open Tickets ezweni lonke futhi abiza u-R80 lilinye.