Umqeqeshi omusha we-Al Ahly uJose Riveiro, obepheka i-Orlando Pirates, uthi leli qembu lase-Egypt lisezingeni lamaqembu ase-Europe futhi ngeke aswele lutho.
Lawa bekungamazwi okuqala kaRiveiro othulwe kwabezindaba njengomqeqeshi omusha weqembu ngokunjalo nasemakhasini ezokuxhumana e-Al Ahly izolo.
Lo mqeqeshi ushiye iPirates ngemuva kokuhlala iminyaka emithathu anqobe kuyo iMTN8 kathathu neNedbank Cup kabili.
Abaningi bebezitshela ukuthi lo mqeqeshi ubuyela eSpain, kanti uzovumbuka e-Egypt ekude ngamahora amane kuphela neSpain uma uhamba ngendiza.
“Ngiseqenjini lase-Europe. Ngeke ngiswele lutho,” kusho uRiveiro.
“Bekuyiphupho lami le futhi yinto ebengiyifisa, ukuqeqesha iqembu elikhulu njenge-Al Ahly.”
Umsebenzi wokuqala kaRiveiro kuzoba wukuhola i-Al Ahly kwiFIFA Club World Cup okuzolindeka ukuthi abeke iqembu okungenani kwi-knockout round.
Izingxoxo nabadlali abafunayo seziqalile.