Uhlelo ngesinqe esiwodwa umqeqeshi we-Al Ahly uRicardo Soares okuvela ukuthi uzokhonjwa indlela kuleliqembu.
USoares ubengakaqedi nezinyamga ezimbili eGibhithe kusukela aqashelwa ukuzovala isikhala sikaPitso Mosimane owashiya.
Lomqeqeshi uthwale kanzima selokhu wafika eGibhithe. Iqembu lakhe lihlehlile embamgweni weligi, laphinde lashaywa izimbangi ezinkulu iZamalek SC kowamanqamu we-Egyptian Cup.
Yize i-Ahly isiqala ukunqoba imidlalo, izikhulu zeqembu sezifuna ukuthola umqeqeshi omusha izothatha izintambo.
Ngokombiko we-le360Sport, i-Ahly ishela uVahid Halilhodzic waseBosnia & Herzegovina.
UHalilhodzic uxoshwe iqembu lesizwe laseMorocco yize elifake kwiNdebe yoMhlaba ezodlala eQatar ngonyaka ka-2022. Uhlale iminyaka emithathu kuma-Atlas Lions, wanqoba imidlalo engu-20.
I-Al Ahly ifuna lomqeqeshi ezoqala ukusebenza ngesizini ka-2022/23. UHalilhodzic usadla amathambo engqondo.