Umqeqeshi weManchester City u-Eric Ten Hag uthi ukube bekuya ngaye ubezoshintsha isikimu sonke sekubuywa ekhefini ngoba abadlali benze amaphutha angenasidingo emdlalweni.
I-United ixetshulwe iBrentford ngo 4-0 ekuhambeni.
Kuyiwe ekhefini i-United isilandela ngemuva ngamagoli amane eqandeni. Bekufana nokuthi abadlali be-United bebeyizithunzi kulomdlalo ngendlela iBrentford ebizigwazela ngakhona ibhece.
Unozinti uDavid De Gea uhlulwe ukuvimba ibhola elilula elishaywe uJosh DaSilva, waliyekela lishumpa ngaphansi kwekhwapha ngemuva kwemizuzu elishumi.
UDe Gea uphinde wabhacaza ephasa kabi ibhola, elithathwe uMathias Jensen ebhokisini, walifaka enethini kalula.
Akuphelanga nesikhathi eside uBen Mee wangqofela enethini igoli lesithathu leBrentford ngomzuzu ka-30. Isitobha se-United uLisandro Martinez ubekhamisile kwenzeka lokhu.
IBrentford iphinde yabiya nelesine igoli elishaywe uBryan Mbuemo ngomzuzu ka-35.
Sekubuywa ekhefini, uTen Hag uqoke ukukhipha uLuke Shaw, Fred noMartinez.
UTen Hag ubeke kanje ebuzwa ngesinqumo sokushintsha abadlali abathathu sekubuywa ekhefini.
“Ngishintshe abadlali abathathu, bekufanele ngibashintshe bonke. Besifuna ukuletha umfutho, akukho okuhlukile ngabadlali esibafake esiwombeni sesibili ngoba akusibo bodwa ababozile.
Sikhombise ubu-amesha namuhla. Bekufanele siyiqonde ngqo iBrentford. Siyivumele ukuthi isifakele ingcindezi, sakhetha ukudlala ibhola emoyeni. Siyidedele yafika kithina, isikhala besikhulu enkundleni, bekudingeka sikhethe ukudlala ibhola elingcono. Sihlulekile. Akuyona indlela esifuna ukudlala ngayo lena.
Besinalo icebo kodwa kufana nokuthi siliphose emgqomeni. Amagoli amabili angene ngenxa yamaphutha, awaqondene necebo lethu lokudlala. Bekufanele senze kangcono. Abadlali bayilandelile imiyalelo yami kodwa bahlulekile ukwenza izinqumo ezihlakaniphile. Ibhola liwumdlalo wamaphutha, sijezile namuhla,” kusho lomqeqeshi.