Unozinti oqokwe njengomdlali ovelele emdlalweni weCape Town City ne-Orlando Pirates uthi kumgeze igilo ukushaya iBucs ngenxa yezinkulumo zabalandeli bayo ezinkundleni zokuxhumana ngaphambi komdlalo.
UKeet ube nomdlalo omuhle iCity iginqa iPirates ngo 1-0 koweBetway Premiership ngoLwesithathu ebusuku eCape Town Stadium. Ngaphandle kwama-saves ambalwa awenzile, uKeet ubelitshala kamnandi kubadlali beCityzens ibhola uma elisusa emuva ikakhulukazi ngezandla. Uqede umdlalo ene-distribution ka-100%.
Lo mphumela ukhuphulele iCity kunombolo 6 kwilog. Ngaphambi kokubhekana namaqembu aseSoweto iCity ibikunombolo 13.
Ekhuluma ngemuva komdlalo uKeet akakufihlanga ukuthi kumnikeze injabulo ukufaka induku kwiPirates ngenxa yezinkulumo zabalandeli bayo ezinkundleni zokuxhumana ngaphambi komdlalo.
“Ezinkundleni zokuxhumana kunabantu abebethi iPirates izozishayela iwarm up match ngaphambi komdlalo wayo kwiCAF Champions League ngempelasonto.
“Bebezithemba – bekholwa ukuthi kuzoba wumdlalo olula. Kuyangijabulisa ukuthi sibafake induku.”
Ngaphambi kwalo mdlalo kunabalandeli beBucs abaqhoshela iChiefs isanda kudliwa yiCity nayo bethi iqembu labo lizobakhombisa ishaywa kanjani.
ICape Town City izothola ukuphumula kule mpelasonto, isiyoze idlale ngoLwesihlanu ngesonto elizayo neRichards Bay FC ezama ukubalekela izembe.