Umqeqeshi weJomo Cosmos egawulwe yizembe kwiGladAfrica Championship uthi akasoze wathenga isitifiketi selinye iqembu ukuze ezobuyisa ezakhe kuPremier Soccer League (PSL).
ICosmos yehlele ehlathini okuyisigaba se-ABC Motsepe League isasalelwe imidlalo emibili kuphela kwiGladAfrica. Idlale ngokulingana neTS Sporting ngo 1-1 eTsakane Stadium izolo.
UJomo, ongumnikazi weqembu aphinde aliqeqeshe ubebukeka engacasukile esekhuluma nezintatheli ngemuva komdlalo.
“Angeke ngithenge isitifiketi selinye iqembu. Angiwagxeki amaqembu athenga isitifiketi kodwa mina angeke ngisithenge. Njengoba sigawulwe yizembe, sizodlala ku-ABC Motsepe League,” kubeka uMjomane.
Kuyinto ejwayelekile ukuthengwa kwezitifiketi zokudlala kwiGladAfrica Championship nakwiDSTV Premiership lapha eNingizimu Afrika.
Ngaphambi kokuba iSwallows ikhuphukele kwiPremiership, yaqala ngokuthenga isitifiketi seMaccabi FC eyayidlala esigabeni sesibili.
IBloemfontein Celtic esidlala kuMotsepe League yadayisela IRoyal AM isitifiketi. IBidvest Wits nayo yadayisela iTshakhuma FC. Nayo iTshakhuma yathengwa iMarumo Gallants. ITshakhuma yagcina ngokuthenga isitifiketi seRoyal AM eyayidlala kuNFD.
UJomo wakhipha u-R50, 000 ethenga iHighlands Park eminyakeni engu-39 eyedlule, wayiqamba ngeCosmos.
“Angiphathekile kabi. Angicasukile ngoba ngigawulwe yizembe. Ngizoqhubeka nokudlala ku-ABC Motsepe League. Akufani nokuthi sizobe sisendimeni yokubhukuda. Ngizobe ngisaqhubeka nokuqeqesha ebholeni, okuyinto engiyithandayo. Uma kuyibhola nje, ngingadlala ngisho kwaMai Mai,” kubeka uJomo.
UJomo uthe umlando nempumelelo yakhe ebholeni elikhokhelayo kuleli uyamkhulumela.
Akekho ongayazi impumelelo yami ebholeni elikhokhelayo, angeke kucishwe lokho emlandweni. Nginqobe izindebe eziyisithupha ebholeni elikhokhelayo. Ngesikhathi ngithenga iHighlands Park, angikaze ngibe nezinhlelo zokunqoba izindebe.
Ngangifuna ukukhulisa abadlali ngibadayise. Ngikwenzile lokho, ngizoqhubeka nokubaqeqesha abadlali noma sigawulwe yizembe,” kuphetha uJomo.
UJomo ube nesandla ekukhuliseni abadlali abaningi bakuleli okukhona kubo u-Aaron Mokoena, Phil Masinga, Pitso Mosimane, Mark Fish noHelman Mkhalele.