Siyakhuphuka isibalo sabadlali okungenzeka bagcine beshiyile kuMaZulu uma zingalungiswa izinkontileka zabo.
NgoLwesithathu ekuseni, kusabalale imibiko ikhomba ukuthi ukaputeni woSuthu uTapelo Xoki uzojoyina i-Orlando Pirates ekuqaleni kwesizini ka-2022/23.
Kuvele ukuthi uXoki uyafuna ukujoyina iBucs kanti neqembu lakhe AmaZulu awanayo inkinga ngokumdayisa. UXoki (27) ufike oSuthwini ngo-2014 esuka kwi-Old Mutual Academy.
Lomdlali uyinsika odongeni loSuthu olungadedelanga nelilodwa igoli emidlalweni emine edlule. Uphinde ashaye namagoli abalulekile, ikakhulukazi amaphenathi nama-freekick.
Akugcini ngo Xoki kuphela, AmaZulu abhekene nenkinga yabadlali abanezinkontileka ezophelelwa yisikhathi ngomhlaka 30 Juni kulonyaka.
ULuvuyo Memela, Augustine Mulenga, Pule Ekstein no Tsepo Masilela bazonqanyukelwa yizinkontileka ekupheleni kwesizini. Kuvela ukuthi neqembu alikaze liyikhulume indaba yokwelulwa kwezinkontileka zabo yize seziphelelwa yisikhathi.
Labadlali badlale indima enkulu befaka Usuthu esigabeni samaqoqo kwiCAF Champions League okokuqala ngqa emlandweni weqembu kulesizini. UMemela ubeshaya amagoli abeweza iqembu sekunzima, uMulenga evamile ukuvusa inyamazane. U-Ekstein noMasilela bebefaka isipiliyoni kwazise sebebuya phesheya kwezilwandle.
Izinqumo ezifana nalezi zishiya imibuzo ngobuholi bukaZungu owathembisa izulu nomhlaba ethenga leliqembu. Wayekubeke obala ukuthi angeke adayisele amaqembu izethenjwa zabadlali, kunalokho uzoqinisa ngabadlali abasezingeni.
Namanje kusenzima ukufakazela lenkulumo kaZungu njengoba Usuthu luvamise ukuthola abadlali mahhala, noma labo abangasadingeki emaqenjini abo. UMemela, Mulenga, Ekstein, Malepe noMasilela bafika bengakhishelwanga imali kuMaZulu. Kuthengwe umgadli uMajok naye ofike wabanda mpo eThekwini.
UZungu uphinde wanqaba ukudedela uSiyethemba Sithebe obefunwa yiChiefs, okuyisinqumo esingaqondakali namanje ngoba lomdlali akabekwa ngisho ebhentshini. Naye u-Abubakar Mobara ukhukuliwe kwiCity, wazifikela mahhala kuMaZulu.