Umlingisi owaduma kwiYizo Yizo neZone 14 uSindi Majola uthi wazikhethela yena ukuqhela endimeni kaqedisizungu kulandela ukubulawa kwamalungu omndeni wakhe ngoba kufunwa izimali zakhe.  

USindi, obeyintandokazi endimeni kaqedisizungu eminyakeni yaphambilini, use Matheny kulezinsuku kulandela ukuvela kwe-video yakhe ephelelwe ushatini emgwaqeni eYeoville, eGoli. 

USindi uthi wayehola imali engu-R52,000 emasontweni amabili kodwa lokho akuzange kumnelise inhliziyo. 

Lomlingisi ugeqe amagula ebalisa ngosizi adlule kulo esasemncane kulendima kaqedisizungu. Uthi akukho ayekuswele eneminyaka engu-22 kodwa ukweneliseka ngaphakathi wayengenakho. 

“Akukho ebengikuswele empilweni, kusukela ngineminyaka engu-22. Benginemoto, amabhizinisi nokunye ongakubala kodwa bengingajabulile. Kwabulawa umndeni wami ngenxa yemali, ngangihola imali engu-R52,000 emasontweni amabili. Ngathandaza kuMdali, ngamcela ukuthi akangiphuce impilo ebengiyiphila. Ngifuna ukuphila njengokujwayelekile, angiludingi usizo,” kuchaza uSindi.