Alikho iqembu ‘elinekhanda eliqine’ njengeManchester United. Abaphathi baleli qembu abafuni ukufunda emaphutheni aseminyakeni edlule ngendlela efanele yokusayinisa abadlali ngaphambi kokuqala kwesizini entsha.
Leli qembu eligijima kwiPremier League liqede kunombolo 5 ngesizini edlule, okuyinto ephoxe abalandeli abaningi kwazise beliqukethe umdlali osebalwa nezinkhakha emlandweni webhola, uCristiano Ronaldo. Akukho ukungabaza ukuthi uCR7 ufike wenza umehluko omkhulu kuleli qembu. Ukube ebengekho mhlawumbe belingeke lingene ngisho kwiTop 10 ngesizini edlule. Nokho naye lo mdlali ufike sekuvalwe amehlo, nakhona ngoba esemataniswa neManchester City.
Sekuwumkhuba ukusayinisa abadlali abasha ngemuva kwabanye kuleli qembu. Okungixayo, iMan United ikumemezele ingakapheli isizini edlule ukuthi isivumelene nomqeqeshi omusha, u-Erik Ten Hag, okusho ukuthi sekunesikhathi eqalile ukusebenza, ebheka nabadlali afuna ukuqinisa ngabo iqembu.
Esakwenzile i-United ukuqinisekisa uhlu lwabadlali abahambayo okungoPaul Pogba, Nemanja Matic, Juan Mata, Edin Cavani, noJesse Lingard. Empeleni bengilindele ukuthi likhale ngempela izembe kuleli qembu elisaqukethe oScott McTominay, Fred, Harry Maguire, no-Aaron Wan Bissaka. Akuvamile nokho ukuthi abaqeqeshi base-Europe bakhuculisise uma befika eqenjini ngakho kunabadlali uTen Hag azozama ukubakhuphula izinga ukuze badlale ibhola alifunayo.
Amaqembu i-United ebibanga nawo ukungena kwiChampions League, i-Arsenal neTottenham Hotspur amatasa athenga abadlali abasha. ILiverpool kufana nokuthi isiqede konke edinga ukukwenza kuleli windi njengoba ithenge umgadli uDarwin Nunez, isikhwishikhwishi seFulham uFabio Carvalho noCalvin Ramsay.
IMan City nayo isimlandile umgadli ‘ebishoda’ ngaye ngesizini edlule, u-Erling Haaland, noma iqede isizini ishaye amagoli awu-99.
Okunye okushaya iMan United njengamanje ukungabibikho kwiChampions League njengoba abadlali abaningi abasezingeni eliphezulu bencamela ukujoyina amaqembu adlala kuyo.Noma kunjalo kodwa, kumele ngabe okungenani kukhona abadlali ababibili abathathu asebesayinisiwe bamenyezelwa.
Njengamanje leli qembu kuthiwa lishela uFrenkie De Jong abanethemba lokuthi uzoqinisa isisu. Uma bemthola uDe Jong kulindeleke ukuthi ayibambe esiswini noDonny Van De Beek. I-United ike yamataniswa noNunez kodwa yakhala ngaphansi eqoka eLiverpool. Okwamanje akucaci ukuthi yimuphi umgadli ehlela ukumsayinisa.
Kubadlali basemuva namanjne kusabalwa uPau Torres weVillareal noJurrien Timber we-Ajax, oyalelwe wumqeqeshi weNetherlands, uLouis Van Gaal, ukuthi angayi kwi-United.
Ngaphandle kwalaba badlali akukho okunye okubambekayo ngabadlali abacathamelwe wuTen Hag.