Umqeqeshi weCape Town u-Eric Tinkler uthi bazowachayisa wonke amaqembu afuna ukuthenga abadlali neCape Town City uma sekuphele isizini.

ICityzens isefomini enhle kwiDSTV Premiership yize yalahlekelwa yizethenjwa eziningi ngoJanuary sekuvulwe iwindi lokuhwebelana ngabadlali. Selokhu kuqale unyaka, iCity ayiyazi induku kwiligi njengoba isinqobe imidlalo eyisithupha, yadlala ngokulingana kwemine.

ICity yadedela u-Abdul Ajagun, Bradley Ralani, Dove Edmilson, Aboubaker Mobara noFagrie Lakay ngoJanuary.

Leliqembu laqoka ukusayinisa abadlali abangaziwa kwiligi okukhona kubo uBrice Ambina, Darwin Gonzalez, Idumba Fasika, Patrick Fisher, Mogamat May nabanye abadlali abasebancane abavukuzwa kwinkulisa.

“Mina nosihlalo saqoka ukwenza izinguquko zokuletha abadlali abasha ngoba sifuna ukwakha kabusha. Akekho umdlali ozodayiswa ngesizini ezayo kodwa kungenzeka sixoxisane uma imali ebekwe etafuleni igculisa. Uma kukhona iqembu laphesheya kwezilwandle elifuna umdlali wethu, sizohlala phansi sixoxe nomdlali.

Akekho umdlali okufanele acabange ukudlala kuPSL. Kumele bafune ukuya phesheya. Nathi siyiqembu sifuna angeke sime endleleni yomdlali uma kukhishwa imali egcukisayo kodwa,” kubeka uTinkler.

ICityzens izobhekana neChippa United emdlalweni weligi olandelayo ngoLwesibili. Kweminye imidlalo esele kukhona oweTS Galaxy, AmaZulu neStellenbosch.